Amplecti, nedum propriùs deprendere sensu, Inde potestatum enasci densissima proles; Nam quodcunque ferit visum, tangive laborat, Quicquid nare bibis, vel concava concipit auris, Quicquid lingua sapit, credas hoc omne, necesse est Ponderibus, textu, discursu, mole, figurâ Particulas præstare leves, et semina rerum. Nunc oculos igitur pascunt, et luce ministrâ Fulgere cuncta vides, spargique coloribus orbem, Dum de sole trahunt alias, aliasque supernè Detorquent, retròque docent se vertere flammas. Nunc trepido inter se fervent corpuscula pulsu, Ut tremor æthera per magnum, latèque natantes Aurarum fluctus avidi vibrantia claustra Auditûs queat allabi, sonitumque propaget. Cominùs interdum non ullo interprete per se Nervorum invadunt teneras quatientia fibras, Sensiferumque urgent ultrò per viscera motum. * LIBER QUARTUS. HACTENUS haud segnis Naturæ arcana retexi Musarum interpres, primusque Britanna per arva Romano liquidum deduxi flumine rivum. Cum Tu opere in medio, spes tanti et causa laboris, Linquis, et æternam fati te condis in umbram! Vidi egomet duro graviter concussa dolore Pectora, in alterius non unquam lenta dolorem ; Et languere oculos vidi, et pallascere amantem Vultum, quo nunquam Pietas nisi rara, Fidesque, Altus amor Veri, et purum spirabat Honestum. Visa tamen tardi demùm inclementia morbi Cessare est, reducemque iterum roseo ore Salutem Speravi, atque unà tecum, dilecte Favoni! Credulus heu longos, ut quondàm, fallere Soles: Heu spes nequicquam dulces, atque irrita vota! Heu mœstos Soles, sine te quos ducere flendo Per desideria, et questus jam cogor inanes! At Tu, sancta anima, et nostri non indiga luctûs Stellanti templo, sincerique ætheris igne, Unde orta es, fruere ; atque ô si secura, nec ultra Mortalis, notos olìm miserata labores Respectes, tenuesque vacet cognoscere curas; Humanam si forte altâ de sede procellam Contemplêre, metus, stimulosque cupidinis acres, Gaudiaque et gemitus, parvoque in corde tumultum Irarum ingentem, et sævos sub pectore fluctus Respice et has lacrymas, memori quas ictus amore Fundo; quod possum, juxtà lugere sepulchrum Dum juvat, ex mutæ vana hæc jactare favilla. GREEK EPIGRAM. Αζόμενος πολύθηρον ἐκηβόλου άλσος ἀνάσσας, ̓Ανταχεῖς Νυμφᾶν ἀγροτερᾶν κελάδω. FINIS. BRADBURY AND EVANS, PRINTERS WHITEFRIARS. |